"राष्ट्रवादी विद्यार्थी काँग्रेस, महाराष्ट्र प्रदेशच्या माध्यमातून ''एक पाऊल विद्यार्थ्यांसाठी'' या मोहिमेअंतर्गत शिक्षण उपसंचालक कोल्हापूर यांना दिले मागण्यांचे निवेदन"

प्रा.अक्षय माने/ कोल्हापूर जिल्हा प्रमुख प्रतिनिधी :

      राष्ट्रवादी विद्यार्थी काँग्रेस, महाराष्ट्र प्रदेशच्या माध्यमातून सुरू असलेल्या 'एक पाऊल विद्यार्थ्यांसाठी' या विशेष व विद्यार्थी हिताय मोहिमेअंतर्गत प्रदेशाध्यक्ष सुनील गव्हाणे यांच्या नेतृत्वाखाली,पश्चिम महाराष्ट्र अध्यक्ष सुहास कदम यांच्या मार्गदर्शनाखाली जिल्हाध्यक्ष निहाल कलावंत यांच्या माध्यमातून आज शिक्षण उपसंचालक कोल्हापूर यांना मागण्यांचे निवेदन देण्यात आले.

      सोबत जिल्ह्यातील संजय घोडावत विद्यापीठ, हौसाबाई मेडिकल कॉलेज, डिकेटीई कॉलेज यांना ही या विशेष मागण्यांचे निवेदन दिले. या निवेदनात खालील मागण्या करण्यात आल्या आहेत.

१. सुप्रीम कोर्टाने दिलेल्या निर्देशाचा मान ठेवत सर्व शिक्षण संस्थांनी आपल्या शिक्षण शुल्कात ( Tuition Fee)  सरसकट कपात करावी. त्याचबरोबर विदयार्थी ज्या सुविधा वापरत नाहीत (Library, Laboratory, Internet, Development, Gymkhana, Education Tour, Annual Functions, etc.) त्याचे शुल्क आकारू नये.

२. शिक्षण शुल्क समितीने लवकरात लवकर राज्यातील सर्व शिक्षण संस्थांच्या शुल्क निश्चितीची पुन्हा प्रक्रिया करून नवीन शुल्क निश्चित करावे तोपर्यंत कोणत्याही पालकांकडून शिक्षण संस्थाना शुल्क आकारण्याचा हक्क नाही,असा आदेश काढावा.

३.ज्या विद्यार्थ्यांचे मागील वर्षाचे शुल्क राहिले असेल त्या विद्यार्थ्यांना कोणत्याही परिस्थितीत परीक्षेपासून अथवा शिक्षणापासून वंचित ठेवू नये. तसेच त्याला महाविद्यालय सोडण्यास भाग पाडू नये.

      यावेळी शौकत मुल्ला (अष्टेकर) प्रदेश संघटक,राष्ट्रवादी विद्यार्थी काँग्रेस, महाराष्ट्र प्रदेश, राष्ट्रवादी विद्यार्थी काँग्रेसचे पदाधिकारी संदेश भोसले व मुन्ना हारुगिरी आदी उपस्थित होते.

     राष्ट्रवादी विद्यार्थी काँग्रेस महाराष्ट्र प्रदेशच्या वतीने घेण्यात आलेल्या या मोहिमेबद्दल सर्व पालक व विद्यार्थी वर्गातून समाधान व्यक्त करण्यात येत आहे.