धक्कादायक! कोल्हापूर: पंचागंगा नदीत सापडला अमेरिकेत आढळणारा शिकारी ' अॅलीगेटर ' मासा.

 

संग्रहित

कोल्हापूर - कोल्हापूरमधील प्रयाग चिखली येथील नदीमध्ये दुर्मिळ अॅलिगेटर जातीचा मासा सापडला आहे. किशोर जगन्नाथ दळवी आणि रघुनाथ दळवी या शेतकऱ्यांना मासेमारी करत असताना त्यांच्या जाळ्याला हा अॅलिगेटर जातीचा मासा लागला आहे. पहिल्यांदाच पंचगंगा नदीत आशा प्रकारचा मासा सापडल्याची घटना घडली असून अनेकांना धक्का बसला आहे. अॅलिगेटर मासा अमेरिकेतल्या गोड्या पाण्यात आढळून येतो मात्र पहिल्यांदाच या भागात या जातीचा मासा मिळाल्याने आश्चर्य व्यक्त केले जात आहे.

   या माशाचे तोंड सुसर/मगर सारखे असून हा मूळ अमेरिकेतील गोड्या पाण्यात सापडतो.याची लांबी 6 फुटापर्यंत तर वजन 50 किलोपर्यंत वाढते. हा शिकारी मासा असल्यामुळे इतर लहान माश्यांना आपले भक्ष्य बनवतो. हा मासा शोभिवंत मासे पालणातून इकडे आल्याची शक्यता व्यक्त केली जात आहे, आणि जर याने प्रजनन करून आपली संख्या वाढविली तर आपल्या स्थानिक माशांना/जीवांना धोका होऊ शकतो असे तज्ञांकडून मत व्यक्त केले जात आहे.

मासे पकडताना सापडला 'हा' दुर्मिळ मासा - आज सकाळी प्रयाग चिखली येथील किशोर जगन्नाथ दळवी आणि रघुनाथ दळवी आणि काही शेतकरी नेहमीप्रमाणे पंचगंगा नदीमध्ये जाळे टाकून मासे पकडत होते. मात्र त्यांच्या जाळ्यात पहिल्यांदाच अमेरिकेत आढळणारा हा दुर्मिळ जातीचा 'अॅलिगेटर' मासा सापडला आहे. माशाचे तोंड सुसरच्या तोंडासारखे दिसत असल्याने त्यांना सुरुवातीला मगरच जाळ्यात अडकली असे वाटले मात्र त्याचे बारीक निरीक्षण केल्यानंतर हा वेगळाच मासा असल्याचे समजले.