 |
| कुरुंदवाडचे सहाय्यक फौजदार व पंटर रंगेहात पकडले |
प्रविणकुमार माने : उपसंपादक
कुरुंदवाड ता.शिरोळ जि.कोल्हापूर येथे बेकायदेशीररित्या तंबाखू, जर्दा, पानमसाला व गुटखा वाहतुक करण्याच्या आरोपाखाली अटक करण्यात आलेल्या संशयित आरोपीला गुन्हयात मदत करणे व जामिनासाठी साहाय्य करण्यासाठी कुरुंदवाड येथील सहायक फौजदारने ५० हजारची लाच मागितली होती. त्यापैकी ४० हजारची लाच स्वीकारताना लाचलुचपत प्रतिबंधक विभागाच्या पथकाने सहायक फौजदारासह पंटरला रंगेहाथ पकडून ताब्यात घेतले आहे.
पोलिसांकडून प्राप्त झालेल्या माहितीनुसार, तक्रारदाराच्या भावावर कुरुंदवाड पोलीस ठाणे हद्दीत बेकायदेशीररित्या तंबाखू, जर्दा, पानमसाला व गुटखा वाहतुक करण्याच्या आरोपाखाली कारवाई करून विविध कलमांतर्गत गुन्हा दाखल करण्यात आला आहे. सदर प्रकरणाचा पुढील तपास कुरुंदवाड पोलीस ठाणेचे सहायक फौजदार राजेंद्र शंकर उगलमुगले (रा.विकास कॉलनी, जयसिगपूर, ता.शिरोळ) यांचेकडे देण्यात आला आहे. मात्र सहायक फौजदार राजेंद्र उगलमुगले यांनी तक्रारदार यांचे भावास जामिनासाठी व गुन्हयात मदत करणेसाठी ₹ ५० हजार रक्कमेची लाच मागितली होती. तडजोडीअंती ₹ ४० हजार लाच रक्कम पंटर अप्पा साहेब सुभाष मगदूम (व.व. ४०,रा.कुरुंदवाड ) याच्यामार्फत आज लाचलुचपत प्रतिबंधक विभागाच्या पथकाने सापळा रचून पंटरला रंगेहाथ पकडून ताब्यात घेतले.
सदर मोठी कारवाई पोलीस अधीक्षक राजेश बनसोडे,अपर पोलीस अधीक्षक सुरज गुरव, अपर पोलीस अधीक्षक सुहास नाडगौडा यांच्या मार्गदर्शनाखाली पोलीस उप- अधीक्षक आदिनाथ बुधवंत, पोहेकॉ शरद पोरे, पोना सुनिल घोसाळकर,पोकॉ नवनाथ कदम, पोकॉ मयुर देसाई यांच्या पथकाने केली.
कुरुंदवाडमध्ये घडलेल्या या घटनेने सर्वत्र खळबळ माजली आहे.
कोणत्याही टिप्पण्‍या नाहीत:
टिप्पणी पोस्ट करा