जत येथील संशयित आरोपी चव्हाण यांची मग्रुरी ; जाब विचारणाऱ्यास दिली धमकी

कोणीकोनूर ता.जत जि. सांगली येथे मारहाण

विशेष प्रतिनिधी :

  कोणीकोनूर ता.जत जि. सांगली येथे घडलेली घटना समोर येत आहे. शेताजवळ मेंढ्या राखत असताना  तुम्ही आमच्या शेतात मेंढ्या का घातल्या यावरून वाद चिघळला. यावेळी कर्नाटकातील ३ मेंढपाळांना दगडाने व काठीने गंभीर जखमी केल्याचा प्रकार घडला आहे. या प्रकरणात संशयित आरोपी प्रकाश उर्फ गोटू बळीराम चव्‍हाण वय व.२८ कोणीकोनूर याच्यावर फिर्यादीना गंभीर जखमी केल्याप्रकरणी गुन्हा दाखल झाला आहे.

    पोलिसांनी संशयित आरोपी चव्हाण याच्या मुसक्या आवळल्या आहेत. सदर  घटना गुरुवारी दुपारी १.०० वाजण्याच्या सुमारास घडली आहे.संशयित आरोपी चव्हाण यांनी केलेल्या गंभीर हल्ल्यात राघू पांडू गोरड वय व. ४५, याराप्पा बाजू सुळ (रा. अलिबादी, ता. विजापूर, जि. विजयपूर, कर्नाटक) व अन्य एक जण गंभीर जखमी झाले आहेत.

    दरम्यान या घटनेनंतर शुक्रवारी सकाळी या कळपासोबत असलेल्या सौ.मनीषा तानाजी कोळेकर (वय .२२) या गर्भवती महिलेचा शेततळ्यात दुर्देवाने बुडून मृत्यू झाला आहे. यामुळे या मेंढपाळ बांधवासमोर नव्याने संकट उभे ठाकले आहे. पोटासाठी भटकंती करणाऱ्या मेंढपाळ बांधवावर ऐन दिवाळीतच असा प्रसंग आल्याने सर्वत्र शोककळा पसरली आहे.

       एका सामाजिक संघटनेने संबंधित आरोपी गुन्हेगार प्रवृत्तीचा असून त्यांच्यावर यापूर्वी अनेक गुन्हे दाखल आहेत.तरी त्याच्यावर कडक कारवाई करावी अशी मागणी सहाय्यक पोलीस निरीक्षक पंकज पवार यांच्याकडे केली आहे.

   याबाबत पोलिसांनी दिलेली अधिक माहिती अशी- कुणिकोणुर – सनमडी या रस्त्याच्या बाजूने कर्नाटक येथून आलेले मेंढपाळ मेंढ्या चारत होते. यावेळी काही मेंढ्या चव्हाण यांच्या शेतात गेल्या.यावेळी संशयित आरोपी प्रकाश उर्फ गोट्या चव्हाण याने जायाप्पा गोरड व यराप्पा सुळ यांना शिवीगाळ केली. मेंढ्या आमच्या शेतात घातल्या म्हणत दगडाने व काठीने गंभीर दोघांना जखमी केले. यात कळपात सोबत असणाऱ्या अन्य एक जण मेंढपाळ जखमी झाला आहे.

यावेळी या मेंढपाळांची नातेवाईक मनीषा कोळेकर भांडण मिट विण्यासाठी गेल्या होत्या. परंतु चव्हाण यांनी सदर गर्भवती महिलेस ढकलून दिले होते. मात्र दुसऱ्याच दिवशी शुक्रवारी सकाळी माडग्याळ येथील एका शेततलावात मनीषा कोळेकर या गर्भवती महिलेचा पाण्यात बुडून मृत्यू झाल्याने हळहळ व्यक्त केली जात आहे.

   दरम्यान, मेंढपाळांना गंभीर दुखापत झाल्याने त्यांना ग्रामीण रुग्णालय माडग्याळ येथे उपचारासाठी दाखल केले होते. यावेळी संशयित आरोपी चव्हाण या ठिकाणी आला होता. मेंढपाळांना का जखमी केले, अशी विचारणा सामाजिक कार्यकर्ते कामांना बंडगर यांनी केली.

  चव्हाण यांनी बंडगर यांच्या अंगावर दगडे टाकण्याचा प्रयत्न केला. तसेच बघून घेण्याची धमकी दिली. यामुळे काही काळ वातावरण तणावाचे बनले होते. जखमी गोरड व सुळ उपचारासाठी शासकीय रुग्णालय मिरज येथे उपचार करीत आहेत. या घटनेचा तपास पोलीस नाईक खरात करत आहेत.

     धनगर समाजातील मेंढपाळ बांधव व महिलांवरील अन्याय व अत्याचार वारंवार घडत आहेत. परंतु संबंधित पोलिस ठाण्यात कोणत्याही प्रकारची दखल घेतली जात नाही. कुणिकोणुर येथे झालेल्या घटनेमुळे भयभीत झालेल्या मनीषा कोळेकर या गर्भवती महिलेचा शेततलावातील पाण्यात पडून दुर्दैवी मृत्यू झाला आहे.

  मेंढपाळांवर हल्ला करणाऱ्या संशयित आरोपी चव्हाण याच्यावर कडक कारवाई करावी. अन्यथा तीव्र आंदोलन करणार असल्याचा तीव्र इशारा मल्हार क्रांती संघटनेच्या जिल्हाध्यक्षा तेजस्विनी व्हनमाने दिला आहे.

     या घटनेने सदर परिसरात गावगुंडांवर पोलिसांचा धाक आहे की नाही हा प्रश्न चिन्ह निर्माण झाला आहे अशा प्रकारची चर्चा सदर परिसरात आहे.