*शिक्षकाच्या त्रासाला कंटाळून महाविद्यालयीन विद्यार्थिनीने केली आत्महत्या*

 

शिक्षकाच्या त्रासाला कंटाळून युवतीची आत्महत्या

*प्रविणकुमार माने :  उपसंपादक*

कोल्हापूर  : कागल तालुक्यातील अर्जुनवाडा राहणाऱ्या एका महाविद्यालयीन युवतीने  शिक्षकाच्या त्रासाला कंटाळून आत्महत्या केल्याची धक्कादायक माहिती समोर आली आहे. कोल्हापूर, मुरगूड पोलिसांनी या शिक्षकाला अटक केली आहे. या घटनेने गाव परिसरात खळबळ माजली आहे.

मयत युवती आकांक्षा व आरोपी शिक्षक कुंभार

      त्याच गावातील संशयित शिक्षकांने सोशल मीडियाच्या माध्यमातून तिच्याकडे विवाहाचा  तगादा लावला होता. गेल्या महिना दीड महिना पासून तिला त्रास देत होता. त्याच्या या त्रासाला कंटाळून सदरच्या तरुणीने विष प्राशन  करून आत्महत्या केली आहे.

   आकांक्षा तानाजी सातवेकर (वय वर्ष १९ ) असे मृत युवतीचे नाव आहे. कोल्हापूर, मुरगूड पोलिसांनी या प्रकरणी संशयित आरोपी म्हणून अमित भीमराव कुंभार या नराधम शिक्षकाला अटक केली आहे.

    अधिकृत सूत्रांकडून प्राप्त झालेल्या माहितीनुसार,अर्जुनवाडा येथील रहिवाशी पण मुगळी (ता. कागल) येथील एका शाळेमध्ये शिक्षक म्हणून कार्यरत असणारा अमित कुंभार हा आपल्या गावातील महाविद्यालयीन शिक्षण घेणाऱ्या आकांक्षाला सतत फोन करत असे. तिच्याबरोबर लग्न करण्यासाठी तिला वारंवार त्रास देत असे. सुरुवातीला मयत युवतीने त्याकडे दुर्लक्ष केले.

    मात्र गेल्या  दीड महिन्यापासून तो वेगवेगळे मेसेजेसही पाठवायचा. तु लग्नासाठी होकार दिलास तर, मी माझी बायको मुलांना सोडून तुझ्या बरोबर लग्न करण्यास तयार होईन असे अनेक संदेश तो पाठवत होता.

      या सर्व प्रकारामुळे २२ जानेवारी रोजी मयत युवतीने या त्रासाला कंटाळून आपल्या राहत्या घरीच विष प्राशन केले. तिला उपचारासाठी कोल्हापूरच्या शासकीय रुग्णालयात दाखल केले. यादरम्यान, २७ जानेवारी रोजी आकांक्षाने, “मी अमित कुंभार यांच्या त्रासाला कंटाळून विष प्राशन केल्याचा जबाब वैद्यकीय अधिकारी आणि पोलीस अधिकारी यांच्या समोर दिला होता.” मात्र, उपचार सुरु असतानाच काल दुपारी तिची प्राणज्योत मालवली. या घटनेने कुटुंबातील व गावकऱ्यांना मोठा धक्का बसला असून अशा नराधम शिक्षकाला कठोरात कठोर शिक्षा व्हावी अशी गावकऱ्यांची मागणी आहे.