*कोल्हापूर लाचलुचपत प्रतिबंधक विभागाची धडाकेबाज कामगिरी ; राधानगरीचे प्रांताधिकारी व सरपंचाला ५ लाखांची लाच घेताना केली अटक*

 

राधानगरीचे प्रांताधिकारी लाचलुचपत प्रतिबंधक विभागाच्या जाळ्यात

*प्रविणकुमार माने : उपसंपादक*

कोल्हापूर  : राधानगरीचे प्रांताधिकारी प्रसेनजित बबनराव प्रधान वय वर्ष ४० आणि फराळे ग्रामपंचायतीचे सरपंच संदीप जयवंत डवर वय वर्ष ४२ हे दोघेजण स्टोन क्रेशर व्यावसायिकावर कारवाई टाळण्यासाठी साडेपाच लाख रुपयाची लाच स्वीकारताना लाचलुचपत प्रतिबंधक पथकाने रविवार दुपारी सेंट्रल बिल्डिंग मधील कार्यालयात रंगेहात पकडले.

      लाचलुचपत प्रतिबंधक विभागाचे पोलीस उपअधीक्षक आदिनाथ बुधवंत आणि त्यांच्या पथकाने धडाकेबाज कारवाई केल्याने महसूल खात्यासह जिल्ह्यात सर्वत्र खळबळ माजली आहे.

     सदर प्रकरणी राधानगरी चे प्रांताधिकारी प्रसेनजीत प्रधान आणि सरपंच संदीप डवर यांच्यावर शाहूपुरी पोलीस ठाणेत गुन्हा दाखल करण्यात आला आहे. 

  अधिकृत सूत्रांकडून प्राप्त झालेल्या माहितीनुसार,तक्रारदार स्टोन क्रशर उद्योजकाचा फराळे ग्रामपंचायतीच्या हद्दीत स्टोन क्रेशरचा व्यवसाय आहे. स्टोन क्रेशरच्या उडणाऱ्या धुळेमुळे परिसर प्रदूषित होत असून तसेच अवजड वाहनांच्या वाहतुकीमुळे परिसरातील रस्त्यांची चाळण झाली आहे. त्याचबरोबर या परिसरातील काही घरांच्या भिंतीना तडे गेले आहेत. याचा अंदाज घेऊन सरपंच संदीप डवर यांनी ग्रामपंचायतीच्या वतीने तक्रारदार व्यावसायिकास क्रेशर का बंद करण्यात येऊ नये याची कारणे दाखवा नोटीस बजावली होती.

        या पार्श्वभूमीवर सरपंच डवर यांच्या नोटिशीच्या आधारे प्रांताधिकारी प्रधान यांनीही स्टोन क्रेशर व्यावसायिकास नोटीस बजावली होती. मात्र सदर उद्योगपतीने ही कारवाई टाळण्यासाठी व्यावसायिकाने सरपंच आणि प्रांताधिकाऱ्यांची जाऊन भेट घेऊन विनंती केली होती. मात्र सरपंच यांनी ही कारवाई टाळण्यासाठी प्रांताधिकारी प्रधान यांना ₹ १० लाख  आणि सरपंचाने स्वतःला दरमहा ₹ १ लाखाची मागणी केली होती.

        व्यावसायिकाने आज सकाळी प्रांताधिकारी यांच्या निवासस्थानी जाऊन सरपंच यांनी आपल्यासाठी दहा लाखाची मागणी केली असल्याचे सांगितले. त्यावर प्रांताधिकार्‍यांनी संमती दर्शवून सरपंच यांच्याकडे पूर्तता करण्यास बजावले. आज दुपारी २.०० वाजता संशयित आरोपी सरपंच डवर आपल्या स्वतःच्या आलिशान मोटारी मधून प्रांताधिकारी कार्यालय जवळ आले होते.व्यावसायिकाकडून प्रांताधिकारींसाठी ५ लाख आणि स्वतःसाठी ५० हजार रुपये स्वीकारताना लाचलुचपत प्रतिबंध पथकाचे पोलिस उपअधीक्षक आदिनाथ बुधवंत आणि त्यांच्या पथकाने सरपंचांना रंगेहात पकडले. त्यानंतर तातडीने प्रांताधिकारी कार्यालयात जाऊन प्रांताधिकारी प्रसेनजित प्रधान यांनाही ताब्यात घेतले.

     आज सुट्टीचा दिवस असताना  प्रांताधिकारी कचेरीत का ? आले होते. यावर प्रश्नचिन्ह निर्माण होत आहे.एकूणच महसूल खात्यातील वरिष्ठ अधिकाऱ्याला लाच प्रकरणी अटक झाल्याने महसूल खात्याबरोबर जिल्ह्यासह राज्यात सर्वत्र खळबळ माजली आहे.

     आजच्या या कारवाईने महसूल खात्यातील मोठ्या अधिकाऱ्याला पकडल्याने कोल्हापूर जिल्हा लाचलुचपत प्रतिबंधक विभागाचे सर्वत्र कौतुक होत आहे. जिल्ह्यातील ही त्यांची सर्वोच्च कामगिरी असल्याची चर्चा सर्वत्र होत आहे.