 |
| लोकस्मृति विद्यार्थिनी वसतिगृहासाठी कुलगुरू डॉ. डी. टी. शिर्क यांच्याकडे देणगीचा धनादेश सुपूर्द करताना डॉ.मीना डोंगरे, सोबत प्र. कुलगुरू डॉ.पी.एस.पाटील, कुलसचिव डॉ.विलास शिंदे,डॉ. सचिन पवार व अन्य मान्यवर |
*प्रा.डॉ. प्रभाकर माने : मुख्य संपादक*
कोल्हापूर : शिवाजी विद्यापीठाच्या प्रस्तावित लोकस्मृती विद्यार्थिनी वसतिगृहासाठी भौतिकशास्त्र अधिविभागाचे निवृत्त प्राध्यापक डॉ. मुरलीधर डोंगरे यांनी आपल्या ८०व्या वाढदिवसाचे औचित्य साधून ६ लाख ५० हजार रुपयांचा निधी देणगी दाखल दिला.
शिवाजी विद्यापीठाने लोकस्मृती विद्यार्थिनी वसतिगृह हा सुमारे शंभर विद्यार्थिनींच्या निवास व्यवस्थेसाठीचा प्रकल्प प्रस्तावित केला आहे. हे वसतिगृह लोकांच्या सहभागातून उभारावे आणि त्यातून लोकांच्या स्मृती जतन केल्या जाव्यात, अशा हेतूने विद्यापीठाने या वसतिगृहाची संकल्पना मांडली. लोकांनी आपले कुटुंब, आप्तस्वकीय यांमधील प्रिय व्यक्तीच्या नावे ठराविक निधी विद्यापीठाकडे द्यावयाचा आणि त्या व्यक्तीच्या नावे निवासी खोल्यांची उभारणी करावयाची, अशी ही संकल्पना आहे. या वसतिगृहाचे महत्त्व लक्षात घेऊन दातृत्वाचा ओघ विद्यापीठाकडे सुरू आहे. डॉ. मुरलीधर डोंगरे यांनीही उदात्त भावनेतून आपल्या ८०व्या वाढदिवसानिमित्त विद्यापीठास ६ लाख ५० हजार रुपयांचा निधी दिला आहे. डॉ. डोंगरे यांच्या वतीने त्यांच्या पत्नी व वनस्पतीशास्त्र अधिविभागाच्या निवृत्त प्राध्यापक डॉ. मीना डोंगरे यांनी काल सायंकाळी कुलगुरू डॉ. दिगंबर शिर्के आणि प्र-कुलगुरू डॉ. प्रमोद पाटील यांच्याकडे देणगीचा धनादेश सुपूर्द केला.
यावेळी उपकुलसचिव डॉ. वैभव ढेरे यांच्यासह डॉ. सचिन पवार, डॉ. प्रशांत चिकोडे, डॉ. विजय कोठावळे, डॉ. चिदानंद कनमाडी, डॉ. ऐश्वर्या पवार, डॉ. तुषार घाटगे आदी उपस्थित होते.
डॉ. मुरलीधर डोंगरे यांचा शिवाजी विद्यापीठ, कोल्हापूरच्या लोकस्मृति विद्यार्थिनी वसतिगृहाच्या निर्मितीसाठी देणगीच्या माध्यमातून सामाजिक संवेदनशीलता व विद्यापीठाविषयी आत्मीयता दिसून येते.
कोणत्याही टिप्पण्‍या नाहीत:
टिप्पणी पोस्ट करा