गुन्हेगारांवर पोलीसांचा धडक मोहीम : ७४ रेकॉर्डवरील आरोपींना हजर करून कठोर इशारा

 

गणेशोत्सव व ईद-ए-मिलाद सणाच्या पार्श्वभूमीवर गुन्हेगारांना कायद्याचं पालन करण्याबाबत मार्गदर्शन करताना अपर पोलीस अधीक्षक अण्णासाहेब जाधव, पोलीस अधिकारी अमोल ठाकूर व पोलीस निरीक्षक शिवाजी गायकवाड

*प्रा.डॉ. प्रभाकर माने : मुख्य संपादक*

जयसिंगपूर : आगामी गणेशोत्सव व ईद-ए-मिलाद सण पार्श्वभूमीवर कायदा व सुव्यवस्थेच्या दृष्टीने कोल्हापूर जिल्हा पोलीस दलाने गुन्हेगारांविरुद्ध विशेष मोहीम राबवली. जिल्हा पोलीस अधीक्षक योगेशकुमार गुप्ता यांच्या आदेशानुसार जयसिंगपूर उपविभागीय स्तरावर रेकॉर्डवरील गुन्हेगारांना शिरोळ पोलीस ठाण्यात बोलावून घेण्यात आले.

   या कारवाईचे मार्गदर्शन अपर पोलीस अधीक्षक गडहिंग्लज विभाग कॅम्प इचलकरंजी अण्णासाहेब जाधव यांनी केले, तर उपविभागीय पोलीस अधिकारी अमोल ठाकूर यांच्या नेतृत्वाखाली ही मोहीम पार पडली. शिरोळ, जयसिंगपूर, हातकणंगले व वडगाव पोलीस ठाण्यांच्या अभिलेखावरील आरोपींना हजर राहण्याचे आदेश देण्यात आले होते.

   आज २२ ऑगस्ट,२०२५ रोजी झालेल्या या विशेष कॅम्पमध्ये शरीराविरुद्ध, मालमत्तेविरुद्ध गुन्हे करणारे तसेच अवैध धंद्यांमध्ये सहभागी असलेले ७४ रेकॉर्डवरील आरोपी हजर झाले. त्यांना आगामी सणासुदीच्या काळात कायद्याचे पालन करण्याच्या कठोर सूचना देण्यात आल्या. पुढे कुणाच्याही विरोधात गुन्हा नोंद झाल्यास मोका, हद्दपारी व एमपीडीए सारख्या कठोर कायद्याअंतर्गत कारवाई करण्यात येईल, असा स्पष्ट इशारा पोलिसांनी दिला.

   सर्व आरोपींकडून भारतीय नागरीक सुरक्षा संहिता अन्वये वैयक्तिक जात मुचलके घेण्यात आले असून, दोन प्रतिष्ठित व्यक्तींना जामीनदार ठेवून चांगल्या वर्तणुकीचा बंधपत्र अपर पोलीस अधीक्षक तथा विशेष कार्यकारी दंडाधिकारी कार्यालयात सादर करण्यात आले.

    या कारवाईमुळे आरोपींमध्ये कायद्याचा धाक निर्माण झाला असून गुन्हेगारी प्रवृत्तीवर नियंत्रण मिळवण्यास मदत झाली आहे. जिल्हा प्रशासनाने राबविलेल्या या मोहिमेमुळे आगामी गणेशोत्सव व ईद-ए-मिलाद शांततेत व सुरक्षिततेत पार पडणार असून नागरिकांचा पोलिस प्रशासनावरील विश्वास अधिक दृढ झाला आहे.