शिवाजी विद्यापीठाचा ६२ वा दीक्षांत समारंभ २४ डिसेंबरला ; प्रख्यात संरक्षण व अवकाश संशोधक डॉ. जी. सतीश रेड्डी प्रमुख पाहुणे

भारतातील प्रख्यात संरक्षण व अवकाश संशोधक डॉ. जी. सतीश रेड्डी

*प्रा. डॉ. प्रभाकर माने : मुख्य संपादक*

कोल्हापूर : शिवाजी विद्यापीठाचा ६२ वा दीक्षांत समारंभ येत्या बुधवारी (दि. २४ डिसेंबर) सकाळी ११ वाजता विद्यापीठ परिसरात होणार आहे. भारतातील प्रख्यात संरक्षण व अवकाश संशोधक डॉ. जी. सतीश रेड्डी हे या समारंभाचे प्रमुख पाहुणे म्हणून उपस्थित राहणार आहेत. कार्यक्रमाच्या अध्यक्षस्थानी विद्यापीठाचे प्रभारी कुलगुरू डॉ. सुरेश गोसावी असतील, तर प्रभारी प्र-कुलगुरू डॉ. ज्योती जाधव प्रमुख उपस्थित राहणार आहेत.

यंदाच्या दीक्षांत समारंभात विज्ञान व तंत्रज्ञान, वाणिज्य व व्यवस्थापन, मानव्यविद्या तसेच आंतरविद्याशाखा या चार विद्याशाखांतील एकूण ४९,९०२ स्नातकांना पदवी प्रदान करण्यात येणार आहे. यामध्ये विद्यार्थिनींचे प्रमाण लक्षणीय असून एकूण २८,५१३ विद्यार्थिनी (५७.१४ टक्के) पदवी प्राप्त करणार आहेत. यापैकी १६,१५९ स्नातक प्रत्यक्ष उपस्थित राहून पदवी स्वीकारणार असून ३३,७४३ स्नातकांना पदवी प्रमाणपत्रे पोस्टाने पाठविण्यात येणार आहेत. दीक्षांत समारंभानंतर सर्व स्नातकांची प्रमाणपत्रे त्यांच्या नॅशनल अॅकॅडेमिक डिपॉझिटरी (NAD) खात्यामध्ये उपलब्ध करून देण्यात येणार आहेत.

अक्षय नलवडे- जहांगीरदार        आर्या देसाई (हुपरी)

      सन २०२४-२५ या शैक्षणिक वर्षात क्रीडा, बौद्धिक, कला, एनसीसी, एनएसएस या क्षेत्रांत उत्कृष्ट कामगिरी तसेच व्यक्तिमत्त्व, नेतृत्वगुण व सामाजिक जाणीव यांमध्ये आदर्श ठरल्याबद्दल राज्यशास्त्र अधिविभागाचा विद्यार्थी अक्षय अरुण नलवडे-जहागीरदार यांना विद्यापीठाचे राष्ट्रपती सुवर्णपदक जाहीर करण्यात आले आहे. तसेच मार्च २०२५ मध्ये झालेल्या एम.ए. परीक्षांमध्ये मानसशास्त्र विषयात सर्वाधिक गुण मिळविल्याबद्दल आर्या संजय देसाई (हुपरी) हिला कुलपती सुवर्णपदक जाहीर करण्यात आले आहे.

   दीक्षांत समारंभाचे प्रमुख पाहुणे डॉ. जी. सतीश रेड्डी हे चार दशकांहून अधिक काळ भारताच्या संरक्षण संशोधन व विकास क्षेत्रात कार्यरत असून डी.आर.डी.ओ.चे अध्यक्ष, संरक्षण संशोधन व विकास विभागाचे सचिव तसेच केंद्रीय संरक्षणमंत्र्यांचे वैज्ञानिक सल्लागार अशी महत्त्वाची पदे त्यांनी भूषविली आहेत. सध्या ते राष्ट्रीय सुरक्षा सल्लागार मंडळाचे सदस्य, आंध्र प्रदेश शासनाचे मानद सल्लागार तसेच एरोनॉटिकल सोसायटी ऑफ इंडियाचे अध्यक्ष म्हणून कार्यरत आहेत. दीक्षांत समारंभात ते स्नातकांना मार्गदर्शनपर दीक्षांत भाषण करणार आहेत.

दरम्यान, दीक्षांत समारंभानिमित्त सलग १८ व्या वर्षी विद्यापीठात ग्रंथमहोत्सवाचे आयोजन करण्यात आले आहे. दि. २३ व २४ डिसेंबर रोजी होणाऱ्या या ग्रंथमहोत्सवात देश-विदेशातील नामवंत प्रकाशक, पुस्तक विक्रेते, डिजिटल ग्रंथ व डेटाबेस पॅकेजेसचे सुमारे ४० स्टॉल्स असणार आहेत. दि. २३ डिसेंबर रोजी सकाळी ७.३० वाजता कमला महाविद्यालयातून ग्रंथदिंडी काढण्यात येणार असून कुलगुरू डॉ. सुरेश गोसावी यांच्या हस्ते तिचे उद्घाटन होईल. दिंडी जनता बझार, राजारामपुरी मेन रोड, आईचा पुतळा, सायबर चौक मार्गे शिवाजी विद्यापीठ गेट क्र. ६ येथे येऊन राजमाता जिजाऊ साहेब सभागृहातील दीक्षांत मंडपात विसर्जित करण्यात येईल. त्यानंतर सकाळी १० वाजता अॅनेक्स इमारत प्रांगणात ग्रंथमहोत्सवाचे उद्घाटन होईल. ग्रंथमहोत्सवातील स्टॉल्स दोन्ही दिवशी सकाळी ९ ते रात्री ९ वाजेपर्यंत खुले राहणार असल्याची माहिती परीक्षा व मूल्यमापन मंडळाचे संचालक डॉ. अजितसिंह जाधव यांनी दिली.